चौरानब्बे हजार ५१३ मेट्रिक टन मल मौज्दात

काठमाडौँ। कृषि तथा पशुपन्छी विकास मन्त्रालयले यो चालु आर्थिक वर्षमा तीन लाख ८९ हजार ४९७ मेट्रिक टन रासायनिक मल आयात गरेको छ । त्यसमध्ये तीन लाख ६९ हजार ५१८ मेट्रिक टन मल बिक्रीवितरण गरिसकेको छ ।

कृषि सामग्री कम्पनी लिमिटेडले दुई लाख ३२ हजार ५२१ मेट्रिक टन मल आयात गरेर एक लाख ३१ हजार ४१९ मेट्रिक टन बिक्री गरिसकेको छ भने साल्ट ट्रेडिङ कर्पोरेसन लिमिटेडले एक लाख ५६ हजार ९७६ मेट्रिक टन आयात गरेर ९८ हजार १९७ मेट्रिक टन बिक्री गरिसकेको छ ।

जेठ २८ गतेसम्मको तथ्याङ्क अनुसार कृषि मन्त्रालयसँग युरिया, डिएपी र पोटास सहित हाल ९४ हजार ५१३ मेट्रिक टन मल मौज्दात रहेका छन् ।

त्यसमध्ये युरिया ६१ हजार ६०५ र डिएपी २२ हजार ४०६ मेट्रिक टन रहेका छन् । कृषि सामग्री कम्पनीसँग युरिया एक लाख ५० हजार ४९२ र डिएपी ६९ हजार ७० मेट्रिक टन मौज्दात रहेका छन्

भने साल्ट ट्रेडिङ कर्पोरेसनसँग युरिया ९९ हजार आठ र डिएपी ५० हजार ३२१ मेट्रिक टन मल मौज्दात रहेको कृषि मन्त्रालयले जनाएको छ ।

भारतको विशाखापटनममा ५१ हजार मेट्रिक टन डिएपी र कलकत्तामा ३० हजार मेट्रिक टन युरिया मल आइसकेको छ ।

त्यसमध्ये केही परिमाणमा मल नेपाल भित्रिसकेको कृषि मन्त्रालयले जनाएको छ । भारतसँग भएको जिटुजी सम्झौता अनुसार २५ हजार मेट्रिक टन मल नेपालका लागि हिँडिसकेको र असारको दोस्रो हप्तासम्म आइपुग्ने बताइएको छ ।

त्यस्तै चीनबाट आउनुपर्ने २५ हजार मेट्रिक टन डिएपी भारतको कलकत्ता आइसकेको र त्यहाँबाट असारको पहिलो हप्ताभित्र नेपाल आइपुग्ने कृषि मन्त्रालयले जनाएको छ ।