काठमाडौं । कुथेली बुखरी स्मल हाइड्रोपावरको आइपीओ आइतबार (साउन ७ गते) बाँडफाँट भएको छ । यसमा गोलाप्रथा मार्फत कुल १० हजार ११५ जनाले सेयर हात पारेका छन् ।
जसमध्ये १ जनालाई ११ कित्ता र बाँकीले १० कित्ताका दरले सेयर पाएका हुन् । यो आइपीओका लागि कुल १० लाख ४८ हजार ४६८ जनाले आवेदन दिएकामा १ हजार १६३ जनाको आवेदन रद्द भएको बिक्री प्रबन्धक एनएमबि क्यापिटलले जनाएको छ ।
बाँकी १० लाख ४७ हजार ३०५ जना योग्य आवेदकलाई गोलाप्रथामा सहभागी गराइएको थियो ।कम्पनीले असार २६ गतेदेखि २९ गतेसम्म सर्वसाधारणका लागि १ लाख १ हजार १५१ कित्ता आइपीओ बिक्री गरेको हो ।
कुल १ लाख २१ हजार ८६८ कित्ता सेयरमध्ये १० प्रतिशत अर्थात् १२ हजार १८६ कित्ता वैदेशिक रोजगारीमा रहेका नेपालीलाई यसअघि नै बाँडफाँट भइसकेको थियो ।
त्यस्तै, ५ प्रतिशत (६ हजार ९३ कित्ता) सामूहिक लगानी कोष र २ प्रतिशत अर्थात् २ हजार ४३७ कित्ता कर्मचारीलाई छुट्याएर बाँकी रहेको सेयर सर्वसाधारणलाई बिक्री गरिएको हो ।
लगानीकर्ताले आइपीओ बाँडफाँटको नतिजा बिक्री प्रबन्धक एनएमबि क्यापिटल र कुथेली बुखरी स्मल हाइड्रोपावरको वेबसाइटबाट हेर्न सक्नेछन् ।
साथै, मेरोसेयर एप र सीडीएस एन्ड क्लियरिङले आइपीओ नतिजा हेर्न बनाएको वेबसाइट https://iporesult.cdsc.com.np/बाट पनि रिजल्ट थाहा पाउन सकिन्छ ।
