काठमाडौं । हिमालयन बैंक लिमिटेडले गत आर्थिक वर्षको चौथो त्रैमाससम्म एक अर्ब ४८ करोड रुपियाँ खुद नाफा आर्जन गरेको छ । बैंकको नाफा अघिल्लो आर्थिक वर्षको सोही अवधिको तुलनामा १०४१.१६ प्रतिशतले बढेको हो । अघिल्लो आवको चौथो त्रैमाससम्म बैंकको खुद नाफा १२ करोड ९७ लाख रुपियाँमा सीमित थियो ।
नाफामा उल्लेख्य वृद्धि भए पनि बैंकको खुद ब्याज आम्दानी भने घटेको छ । अघिल्लो आवमा १० अर्ब ४५ करोड रुपियाँ रहेको खुद ब्याज आम्दानी गत आवमा घटेर ८ अर्ब ८१ करोड रुपियाँमा झरेको छ । त्यस्तै, खुद शुल्क तथा कमिसन आम्दानी पनि १ अर्ब १५ करोड रुपियाँबाट घटेर एक अर्ब छ करोड रुपियाँमा सीमित भएको छ ।
समीक्षा अवधिसम्म बैंकको खुद सञ्चालन आम्दानी ८ अर्ब २६ करोड रुपियाँ र सञ्चालन मुनाफा २ अर्ब ६२ करोड रुपियाँ रहेको छ । बैंकको रिटेन्ड अर्निङ भने ९ अर्ब ८४ करोड रुपियाँले ऋणात्मक रहेको छ । यता, बैंकको रिजर्भ २६ अर्ब ८० करोड रुपियाँ धनात्मक रहेको छ ।
हिमालयन बैंकले गत आवमा निक्षेप संकलन बढाएको छ भने कर्जा प्रवाह केही घटेको छ । बैंकको निक्षेप ३ खर्ब ९ अर्ब रुपियाँबाट बढेर तीन खर्ब ५१ अर्ब रुपियाँ पुगेको छ । कर्जा प्रवाह भने अघिल्लो आवको दुई खर्ब ३० अर्ब रुपियाँबाट घटेर २ खर्ब २७ अर्ब रुपियाँमा झरेको छ ।
बैंकको खराब कर्जा अनुपात (एनपीएल) ७.९६ प्रतिशत रहेको छ । अघिल्लो आवमा इम्पेयरमेन्ट चार्जका लागि तीन अर्ब ७५ करोड रुपियाँ छुट्याएको बैंकले गत आवमा २ अर्ब ८९ करोड रुपियाँ छुट्याएको छ ।
समीक्षा अवधिसम्म बैंकको वितरणयोग्य मुनाफा नौ अर्ब ८४ करोड रुपियाँले ऋणात्मक रहेको छ । यद्यपि, बैंकको प्रतिसेयर आम्दानी (ईपीएस) भने उल्लेख्य सुधार भएको छ । अघिल्लो आवमा ०.६० रुपियाँ रहेको ईपीएस बढेर गत आवमा ६.५६ रुपियाँ पुगेको छ ।
बैंकको प्रतिसेयर नेटवर्थ १७७.४८ रुपियाँ, प्रतिसेयर कुल सम्पत्तिको मूल्य १ हजार ८५१.०४ रुपियाँ र तरलता अनुपात ३५.३२ प्रतिशत कायम भएको छ ।
